Matthew 25

Umzekeliso Wezintombi Ezilitshumi

1“Kulesosikhathi umbuso wezulu uzakuba njengezintombi ezilitshumi ezathatha izibane zazo zaphuma ukuyahlangabeza umyeni. 2Ezinhlanu zazo zaziyiziwula, ezinhlanu zihlakaniphile. 3Eziyiziwula zathatha izibane zazo kodwa kazithathanga amafutha.

4Kodwa ezihlakaniphileyo zathwala amafutha emagabheni kanye lezibane zazo. 5Umyeni waphuza ukufika zonke zaze zawozela zathathwa yibuthongo.

6“Phakathi kobusuku kwamenyezelwa kwathiwa, ‘Nangu umyeni! Phumani limhlangabeze!’

7“Zasezivuka zonke izintombi zalumathisa izibane zazo. 8Lezo ezaziyiziwula zathi kwezihlakaniphileyo, ‘Ake lisiphe lathi amanye amafutha enu; izibane zethu ziyacima.’

9“Zaphendula ezihlakaniphileyo zathi, ‘Hatshi, kakulamafutha angasanela thina lani. Hambani liye kulabo abathengisa amafutha liyozithengela awenu.’

10“Kodwa kwathi besayathenga amafutha umyeni wafika. Izintombi ezazizilungiselele zangena laye edilini lomthimba. Umnyango wase uvalwa.

11“Ngemuva kwesikhathi ezinye lazo zatsho sezifikile. Zathi, ‘Mnumzana! Mnumzana! Ake usivulele umnyango!’

12“Kodwa waphendula wathi, ‘Ngiqinisile, kangilazi.’

13“Ngakho lindani ngokuba kalilwazi usuku loba isikhathi.

Umzekeliso Wamathalenta

14“Njalo unjengendoda eyathatha uhambo, eyabiza izisebenzi zayo yazigcinisa impahla yayo. 15Oyedwa yamupha amathalenta amahlanu emali, omunye amabili omunye njalo ithalenta elilodwa, ngulowo kusiya ngamandla akhe. Yase isuka ingena uhambo lwayo.

16Leyondoda eyayiphiwe amathalenta amahlanu yahle yasuka yayayidayiza leyomali yazuza amanye amahlanu. 17Yenza njalo laleyo eyayiphiwe amabili, yazuza amanye amabili.

18Kodwa indoda eyayiphiwe ithalenta elilodwa yasuka yemba igodi emhlabathini yayifihla imali yenkosi yayo.

19Ngemuva kwesikhathi eside umnini walezozisebenzi wabuya wafisa ukwazi ukuthi babehambise njani ngaleyomali. 20Leyondoda eyayiphiwe amathalenta amahlanu yaletha amanye amahlanu. Yathi, ‘Mnumzana, wangethemba ngamathalenta amahlanu. Khangela, sengizuze amanye amahlanu.’

21“Umnini wayo waphendula wathi, ‘Wenze kuhle, nceku elungileyo lethembekileyo! Uthembekile ezintweni ezilutshwana; ngizakuphathisa izinto ezinengi. Woza uzojabula kanye lenkosi yakho!’

22“Indoda eyayilamathalenta amabili layo yeza. Yathi, ‘Mnumzana, wangethemba ngamathalenta amabili; khangela, sengizuze amanye amabili.’

23“Umniniyo waphendula wathi, ‘Wenze kuhle, nceku elungileyo lethembekileyo! Uthembekile ngezinto ezilutshwana; ngizakuphathisa izinto ezinengi. Woza uzojabula kanye lenkosi yakho!

24“Kwasekusiza leyondoda eyayiphiwe ithalenta elilodwa. Yathi, ‘Mnumzana, bengikwazi ukuthi uyindoda elukhuni, evuna lapho engahlanyelanga khona njalo ibuthe lapho ingazange ihaze khona inhlanyelo.

25Yikho ngesaba ngasuka ngayafihla ithalenta lakho emhlabathini. Khangela, nanku okungokwakho.’

26“Umnumzana waphendula wathi, ‘Wena nceku embi, elivila! Utsho ukuthi wazile ukuthi ngivuna lapho engingahlanyelanga khona njalo ngibuthe lapho engingahazanga khona inhlanyelo? 27Ngabe phela imali yami uyibekise kwabebhanga, ukuze kuthi ekubuyeni kwami ngiyizuze isilenzalo.

28“Mthatheleni ithalenta lelo liliphe lowo olamathalenta alitshumi.

29Ngokuba lowo olakho uzaphiwa okunye njalo abesesiba lokunengi. Lowo ongelakho, lalokho alakho uzakwemukwa. 30Manje-ke iphoseni ngaphandle inceku engelamsebenzi, ebumnyameni lapho okuzakuba khona ukukhala lokugedla amazinyo.’

Izimvu Lezimbuzi

31“Nxa iNdodana yoMuntu isisiza ngenkazimulo yayo, ikanye lezingilosi zonke, izahlala esihlalweni sayo sobukhosi ilenkazimulo yasezulwini.

32Zonke izizwe zizabuthaniswa phambi kwayo, ibe isisahlukanisa abantu omunye komunye njengomalusi esahlukanisa izimvu ezimbuzini. 33Izabeka izimvu ngasekunene kwayo lezimbuzi ngasekhohlo.

34Lapho-ke iNkosi izakuthi kulabo abangasekunene kwayo, ‘Wozani, lina elibusisiweyo nguBaba; thathani ilifa lenu, umbuso owalungiselwa lina kulokhu kwadalwa umhlaba. 35Ngokuba ngangilambile, langinika ulutho oludliwayo, ngangomile langipha okunathwayo, ngangiyisihambi langingenisa,

36ngangiswela izambatho langigqokisa, ngangigula langonga, ngangisentolongweni lazongibona.’

37“Abalungileyo bazamphendula bathi, ‘Nkosi, sakubona nini ulambile sakupha ukudla na, kumbe womile sakunathisa? 38Sakubona nini uyisihambi sakungenisa na, kumbe uswela izambatho sakugqokisa? 39Sakubona nini ugula kumbe usentolongweni seza sazakubona na?’

40“INkosi izaphendula ithi, ‘Ngilitshela iqiniso ukuthi loba yini elayenzela loba ngomncinyane kanganani walaba abazalwane bami, lakwenzela mina.’

41“INkosi izakuthi kulabo abasekhohlo kwayo, ‘Xekani kimi lina elithukiweyo liye emlilweni wanininini owalungiselwa uSathane lezingilosi zakhe. 42Ngokuba ngangilambile, kalingiphanga lutho lokudla, ngangomile kalingiphanga lutho lokunatha, 43ngangiyisihambi kalingingenisanga, ngangiswela izambatho kalingigqokisanga, ngangigula njalo ngisentolongweni kalizange lingidinge.’

44“Labo bazaphendula bathi, ‘Nkosi, sakubona nini ulambile kumbe womile kumbe uyisihambi kumbe ungelazigqoko kumbe ugula noma usentolongweni asaze sakunceda na?’

45“Izaphendula ithi, ‘Ngiqinisile ngithi, loba kuyini elingakwenzelanga oyedwa nje omncinyane kulabo bonke walaba, kalikwenzelanga mina.’

46“Bazasuka baye ekujezisweni kwaphakade, kodwa abalungileyo baye ekuphileni okungapheliyo.”